Kocin kungiyar kwallon kafa ta Roma, Eusebio Di Francesco ya bar aikinsa nan take.
Di Francesco ya koma Roma da aiki a watan Yunin 2017, inda ya maye gurbin Luciano Spalleti.
Kocin ya kai kungiyar wasan daf da karshe a gasar kofin Zakaraun Turai ta Champions League ya kuma doke Barcelona a wasan kungiyoyi takwas, sannan ya yi na uku a teburin Seria A a shekarar farko.
Sai dai kuma Di Francesco ya shiga matsi bayan da Lazio ta doke Roma 3-0 a makon jiya da rashin nasara da ta yi a gidan Porto da ta kai aka fitar da su a gasar Champions League ta bana.
Watakila Claudio Ranieri wanda Fulham ta sallama a makon jiya ya karbi aikin horar da Roma wadda ya taba aiki da ita tsakanin 2009 zuwa 2011.
Roma tana ta biyar a kan teburin Seria A da tazarar maki uku tsakaninta da ta hudu Inter Milan.