Asalin hoton, Getty Images
Ranar Laraba Real Madrid ta yi ban kwana da Copa del Rey, bayan da Alcoyano ta fitar da ita daga gasar bana.
Alcoyano ta yi nasara ne da ci 2-1 da ta kai kungiyar da ke buga La Liga ta rasa kofi na biyu a bana kenan.
Real Madrid tun farko ta rasa Spanish Super Cup, kofin da ta lashe a bara a Saudia Arabia.
Real ta yi rashin nasara ne a hannun Athletic Bilbao, wadda ta lashe kofin, bayan da ta doke Barcelona kuma na uku jumulla da ta dauka.
Yanzu dai ta tabbata cewar Real Madrid ba za ta lashe kofi uku a ban aba, domin ko a bara ma La Liga da Spanish Super Cup ta yi nasarar dauka.
Rabon da Real ta kare kakar tamaula ba tare da lashe kofi bat un kakar 2009/10, ita kuwa Barcelona ba ta ci kofi ko daya ba.
Kofunan da ke gaban Real sun hada da na Champions League, wanda ta kai karawar zagaye na biyu za kuma ta fafata da Atalanta.
Koda yake masu hasashe bas a saka Real Madrid cikin wadanda ake sa ran za ta iya lashe kofin na zakarun Turai na bana.
Hakan ya biyo bayan kasa kokari da kungiyar ta yi a karawar cikin rukuni da sauran wasannin da take yi a bana.
Real tana mataki na biyu a kan teburin La Liga da tazarar maki hudu tsakaninta da Atletico Madrid mai kwantan wasa biyu.
Alcoyano ta karasa wasan da yan kwallo 10 a cikin fili, bayan jan kati da aka yi mata, ita kuwa Real ta saka fitattun yan was anta da suka hada da Eden Hazard da Karim Benzema da Toni Kroos da Casemiro amma ta kasa cin fafatawar.
Wannan ne karon farko da Real ta yi rashin nasara a hannun Alcoyano tun bayan 1951 a wasa uku da suka yi a gasar.
