Hukumar NDLEA dake yaki da hana sha da fataucin miyagun kwayoyi a Najeriya ta kama wani mutum mai suna Friday Ahukanna Chigbu mai shekaru 93 a jihar Abia da laifin safarar miyagun kwayoyi.
A cewar wata sanarwa da mai magana da yawun hukumar NDLEA, Femi Babafemi ya fitar a ranar Lahadi, an kama Chigbu ne a gidansa dake kauyen Umuagbaigba, Amavo Nkwogu village, dake karamar hukumar Osisioma ta jihar a ranar 7 ga watan Afrilu.
Ya ce bayan an gudanar da bincike a gidansa an gano tabar wiwi ta Skunk mai nauyin kilogiram 7.7.
A cewar NDLEA wanda ake zargin ya yi iƙirarin cewa ya fara sana’ar haramtacciyar kayan mayen ne a shekarar da ta gabata.
