Mazauna yankin Sokoto da kewaye na murnar kashe wani kasurgumin shugaban ‘yan bindiga, Kachallah Halilu Buzu, da sojojin Najeriya suka yi a farmakin da suka kai a jihar Zamfara.
Mummunan farmakin da sojoji suka kaddamar a maboyar ‘yan bindigar a Zamfara a ranar Alhamis, ya yi sanadin kashe ‘yan bindiga da dama ciki har da Kachallah Halilu Buzu.
Babban Hafsan Hafsoshin Tsaro (CDS), Janar Christopher Musa, ne ya tabbatar da kashe wadannan ‘yan bindigar da suka yi kaurin suna wajen kai hare-hare kan ‘yan bindiga da sauran masu aikata laifuka a fadin kasar nan.
CDS Musa ya ce dakarun sojin Najeriya sun yi nasarar kawar da wani sarkin ‘yan ta’adda, wanda aka fi sani da Halilu Buzu tare da wani adadi mai yawa na mayakansa a kauyen Mayanchi da ke karamar hukumar Maru a jihar Zamfara a ziyarar da ya kai wa gwamnan jihar a ranar Juma’a.
Shahararren madugun ‘yan fashin, wanda aka fi sani da Kachallah ko Halilu Buzu, dan kasar Nijar, ba wai kawai yana ta’addanci a yankin Arewa maso Yamma ba ne, har ma makamai da harsasai yake samarwa ga kungiyoyin ‘yan fashi da dama.
Kachalla, wanda ke da alaka mai karfi wajen safarar makamai zuwa Najeriya, ya kuma kasance mai ba da jagoranci ga shugabannin kungiyoyin ‘yan fashi da dama irin su Bello Turji da makamantansu.
