Asalin hoton, Getty Images
Lionel Messi da Neymar suna cikin ‘yan wasan Paris St Germain da za su kara da Club Brugge a Champions League ranar Laraba.
PSG za ta ziyarci Belgium, domin fafatawa da kungiyar Belgium a wasan farko na cikin rukuni na daya a gasar ta zakarun Turai ta bana.
‘Yan wasan biyu ba su yi wa PSG wasan gasar Ligue 1 ranar Asabar da ta doke Clemont 4-0 ba.
Messi da Neymar sun buga wa kasashensu wasannin neman shiga gasar cin kofin duniya ranar Alhamis, sannan suka koma birnin Paris a daren Juma’a.
Angel Di Maria dan kwallon tawagar Argentina ba zai yi wa PSG wasan Champions League uku ba a bana, bayan da UEFA ta dakatar da shi, sakamakon ketar da ya yi wa Fernandinho a bara a fafatawa da Manchester City karawar daf da karshe.
Har yanzu Sergio Ramos bai fara buga wa PSG wasa ba, tun bayan da ya koma kungiyar daga Real Madrid a bana, wadda ta kasa cimma yarjejeniyar tsawaita kwantiragin mai tsaron bayan, wanda ke jinya kawo yanzu.
Shima Marco Verratti baya cikin ‘yan kwallon da za su buga wa PSG karawa da Club Brugge, bayan da ya yi rauni a lokacin da ya yi wa tawagar Italiya wasan nemna gurbin shiga gasar cin kofin duniya.
(BBC Hausa)
