Wasu mahara sun kai hari Ƙaramar Hukumar Kauru ta Jihar Kaduna tare da kashe wani makiyayi ta hanyar yanke kansa.
Kwamashinan Tsaro Samuel Aruwan wanda ya tabbatar da faruwar lamarin ranar Talata, ya bayyana sunan makiyayin da Yusuf Mahmuda.
Ya ce Yusuf na tsaka da kiwon shanu tare da wasu makiyayan a Zaman Chawai lokacin da aka kashe shi sakamakon wata hatsaniya game da haɗewar dabbobinsa da na wasu.
A cewar kwamashinan, maharan sun yanke kan makiyayin sannan suka tafi da shi yayin da sauran abokan kiwonsa suka watse don tsira da rayuwa da kuma dabbobinsu.
Daga baya kuma wani rikicin ƙabilanci ya ɓarke da tsakar rana a Kasuwar Bakin Kogi da ke Kauru.
