Wani Jirgin binciken dakarun Rasha ya yi batan dabo a tekun Mediterranean dauke da sojojin ta 14.
Kafar yada labaran Rashar ta ce kamar yadda ma’aikatar tsaron kasar a Moscow ta shaida, jirgin ya bata ne a hare-hare da Isra’ila ta kai ta sama akan Syria.
Kuma jirgin Rashar ya gano wata roka da aka harba daga jirgin ruwan yakin Faransa.
Wani jami’in Amurka da ba a bayyana sunansa ba, ya shaidawa kamfanin dilancin labaran Reuters cewa Washington na ganin cewa gwamnatin Syria ce ta kakkabo jirgin da makamin artilary amma a bisa kuskure, a kokarinta na harba makami mai linzami a kan Isra’ila.
Wannan al’amari na zuwa ne adaidai lokacin da Rasha da Turkiya suka amince su kafa yankin tudun mun tsira tsakanin dakarun gwamnati da na ‘yan tawaye a lardin Idlib na Syria.
Moscow ta ce yarjejeniyar na nufin gwamnatin Syria a yanzu za ta dakatar da kaddamar da hari a yanki na karshe da ‘yan tawaye ke da karfi wanda kuma ke dauke da mutum miliyan 3.
Rasha ta ce za a bukaci kungiyoyin da ta kira masu tsautsauran ra’ayi irinsu Al-qaeda janyewa daga yankin.