Shugabancin jam’iyar ADC na ƙasa tsagin David Mark ya gana da na jam’iyar PDP ƙarƙashin Kabiru Tanimu Turki a Abuja.
Taron na zuwa ne a dai-dai lokacin da dukkanin jam’iyyun biyu ke fama da rikicin shugabanci na cikin gida.
Wadanda suka zauna a ganawar daga tsagin Mark sun haɗa da tsohon mataimakin shugaban ƙasa, Atiku Abubakar, tsohon gwamnan Kano, Rabi’u Musa Kwankwaso, Aminu Waziri Tambuwal tsohon gwamnan Sokoto, tsohon ministan shari’a, Abubakar Malami, tsohon gwamnan jihar Ribas, Rotimi Amaechi da kuma tsohon gwamnan jihar Anambra, Peter Obi.
Daga ɓangaren Turaki akwai gwamnan jihar Oyo, Seyi Makinde, tsohon gwamnan jihar Niger, Babangida Aliyu, tsohon ministan yaɗa labarai, Farfesa Jerry Gana da kuma tsohon shugaban majalisar dattawa, Adolphus Wabara.
Jaridar The Cable ta gano cewa ganawar ta su na da nasaba da lalubo hanyoyin da za su haɗa ƙarfi da ƙarfe domin tunkarar zaɓen shekarar 2027.
