A kokarinsa na cika alkawuran yakin neman zaben gwamnan jihar Kano, Abba Kabir Yusuf, ya bayar da umarnin rusa wasu haramtattun gine-gine da aka gina a jihar.
A cikin wata sanarwa mai dauke da sa hannun babban sakataren yada labaran gwamnan, Sunusi Bature Dawakin Tofa, ya ce rusa gine-ginen ba bisa ka’ida ba ya zama dole saboda yana cikin alkawuran yakin neman zaben gwamnan.
Gwamna Abba Kabir Yusuf ya bayyana cewa za a rushe gine-ginen da aka gina a makarantu, masallatai, wuraren wasan yara, makabarta, kasuwanni, da asibitoci domin tabbatar da bin ka’idar tsara birane da kawata su.
“Wadannan wuraren ana amfani da su ne don amfanin jama’a, don haka abin takaici ne ganin yadda ’yan kasa marasa kishin kasa ke lalata da kuma sauya wuraren jama’a ba tare da an katse suba.
“Za mu kawo karshen kwacen filaye da gina gine-ginen ba bisa ka’ida ba a jihar,” inji shi.
