Ƙungiyar ‘Yan Kasuwar Man Fetur ta Ƙasa (IPMAN) ta bayyana cewa akwai yuwuwar farashin lita ɗaya na man fetur ya sauka zuwa N800 a kwanaki masu zuwa, sakamakon haɗin gwiwar da ake samu tsakanin masu sayar da man da kuma Matatar Man Dangote.
Jami’in hulɗa da jama’a na IPMAN, Chinedu Ukadike, ne ya bayyana hakan a wata hira da ya yi da manema labarai a ranar Asabar, 31 ga Mayu, 2025.
A cewarsa, yanzu haka ana sayar da litar man fetur a tsakanin N875 zuwa N910 a yankin Legas da Abuja, amma akwai yuwuwar farashin ya ƙara raguwa sakamakon sauye-sauyen kasuwa da kuma sayarwa kai tsaye daga Matatar Dangote.
Ya ce: “Abin da muke roƙo shi ne, Dangote ya rika sayar da man fetur ga duk masu sayar da mai daidai da yadda yake sayarwa ga kamfanonin MRS, NNPCL da sauran manyan dillalai. Wannan zai haifar da ƙarin gasa a kasuwa wanda zai amfani jama’a.”
Ukadike ya ƙara da cewa tun da gwamnati ba ta sa farashi ba kuma komai yana tafiya ne bisa buƙata da wadatar kayayyaki, to da zarar an rage farashi zuwa N800, hakan zai ƙara yawan motoci da za su rika siyan mai.
“Farashi yana da matuƙar tasiri wajen amfani da fetur. Idan farashi ya ragu, mutane da yawa za su rika siyan mai fiye da da.”
Wannan batu ya biyo bayan sauƙin farashin lita na man fetur da aka fara gani daga Matatar Dangote da dillalan sayar da man sa, inda ake sayar da lita ɗaya tsakanin N875 da N895 a wasu sassan ƙasar nan.
Farashin Man Fetur Na Iya Sauka Zuwa Naira 800 – ‘Yan Kasuwa
