Hukumar tsaro ta farin kaya watau DSS ta saki tsohon shugaban hukumar da ke yaki da masu yi wa tattalin arzikin kasa zagon kasa, Abdulrasheed Bawa, bayan ya shafe kwanaki 134 a hannun ‘yan sandan sirrin.
An tabbatar da cewa an saki Bawa ne daga hedikwatar ‘yan sandan sirri ta kasa, ‘Yellow House,’ da ke Abuja, a daren Laraba.
Hukumar DSS ta kama Bawa tare da tsare shi a ranar 14 ga Yuni, 2023, biyo bayan gayyatar da aka yi masa kan wasu dalilai da ba a bayyana ba, bayan da ya ziyarci Shugaba Bola Tinubu tun a ranar.
Rahotanni sun bayyana cewa bayan kama Bawa a ranar 14 ga watan Yuni, 2023, ana tuhumarsa da laifin almundahanar kudi a shekarunsa na aiki a hukumar yaki da cin hanci da rashawa.
Wasu majiyoyi da suka jiɓinci lamarin sun kuma bayyana cewa tsohon shugaban hukumar ta EFCC ya ƙi daukar hayar lauya duk da cewa an tsare shi.
Da aka tuntubi kakakin hukumar DSS, da na EFCC, Dokta Peter Afunanya da Dele Oyewale da yammacin ranar Laraba, ba su amsa tambayar da aka yi kan sakin Bawa ba.
