Bassey Asuquo insifectan dansanda ya kashe kansa a garin Sarkin Pawa dake karamar hukumar Munya ta jihar Niger.
Zagazola Makama dake wallafa bayanan sha’anin tsaro kan yankin tafkin Chadi ya ce lamarin ya faru da misalin karfe 1:59 na daren ranar Laraba.
Makama ya ce Asuquo mamba ne na rundunar yan sandan kwantar da tarzoma ta 28 dake Umuahia a jihar Abia wanda aka turo aiki na musamman yankin.
Wasu majiyoyi sun fadawa Makama cewa marigayin ya rika nuna wasu dabi’u na daban gabanin faruwar lamarin.
A wani mataki na kariya kwamandan rukinin da yake ya bayar da umarnin karbe bindigarsa domin a ajiyeta a dakin ajiye makamai na ofishin yan sanda dake Sarkin Pawa.
Makama ya kara da cewa Asuquo ya yi amfani da bindigar abokinsa lokacin da yake bacci inda ya harbi kansa a ka.
Wasiu Abiodun mai magana da yawun rundunar yan sandan jihar Niger ya tabbatar da faruwar lamarin inda ya ce ana cigaba da gudanar da bincike.
