Babban Bankin Najeriya CBN ya bayyana dalilin da ya sa ake samun karancin takardun kuɗin naira a faɗin kasa baki ɗaya.
Hakan na zuwa ne biyo bayan jerin korafe-korafe da masu amfani da bankuna ke yi na fuskantar karancin takardun naira a na’urar ATM, cikin bankuna wajen masu POS dama masu sauya kuɗaɗen kasashen waje.
A wata sanarwa da sashen hulda da ƴan jarida na CBN ya fitar babban bankin ya ce yadda bankunan kasuwanci ke kwasar takardu kudi da yawa daga rassan CBN daban-daban na daga cikin dalilin da ya haifar da ƙarancin kudin.
Har ila yau sanarwar ta kara da cewa yadda kwastomimin banki suke yawan cire kudi saboda fargabar dawo da dokar takaita amfani da zallar kudi shi ma ya taimaka wajen samun karancin takardar kudin na naira.
CBN ya ce akwai isassun takardun kuɗin naira da suke zagayawa a hada-hadar kasuwanci da ake a Najeriya.
