‘Yan jam’iyyar Conservative mai mulkin Birtaniya da na bangaren adawa sun kayar da gwamnatin kasar a mataki na farko na kokarin da suke yi na hana Birtaniya ficewa daga Tarayyar Turai ba tare da yarjejeniya ba.
Majalisar ta gudanar da zabe inda masu goyon bayan ta karbe ikon gudanarwa suka kayar da masu goyon bayan Firai ministan da kuri’u 328, inda ya sami 301.
Wannan na nufin za su iya gabatar da kudurin doka da zai jinkirta ranar ficewar Birtaniya daga Tarayyar ta Turai.
Amma Firai ministan ya fusata da matakin da ‘yan majalisar suka dauka, kuma ya yi alkawarin gudanar da wani kudurin a yi zaben gama gari.
Jagoran jam’iyyar adawa ta Labour Jeremy Corbyn ya nemi majalisar da ta tabbata an gabatar da kudurin hana Birtaniya ficewa daga Tarayyar Turai kafin a gudanar da zaben.
Duka-duka, ‘yan majalisa 21 ne daga jam’iyyar ta Conservative – ciki har da wasu tsofaffin ministoci – suka hada kai da ‘yan adawa domin kayar da gwamnatin a kan wannan muhimmin batu.
Bayan da aka kammala zaman majalisar, fadar Firai minista da ke lamba 10 Downing Street ta fitar da wata sanarwa da ke cewa za a nemi korar ‘yan majalisar da suka yi boren daga jam’iyyar.
Firai ministan ya so ya tsorata ‘yan majalisar ne da gargadin da ya yi na korarsu daga jam’iyyar, amma hakan bai samu ba.