Asalin hoton, Getty Images
Kakar kwallon kafa ta bana ta nuna rashin kokarin Barcelona a gasar cikin gida, amma tana haskakawa a Champions League ta 2020/21.
Kungiyar ta Camp Nou tana yin rashin nasara a hannun kungiyoyin da bai kamata su doke ta ba a bana da hakan ke nuna cewar da kyar ne idan tana cikin wadanda ake sa lashe kofin La Liga na bana.
Ranar Asabar Cadiz ta doke Barcelona da ci 2-1 a wasan da suka fafatawar da suka yi a filin Ramon de Carranza.
Barcelona tana tare da shugaba na rikon kwarya wanda ke son ragamar mulkin nan gaba, bayan da kungiyar ke fuskantar kalubalen biyan albashi, sakamakon matsin tattalin arziki da cutar korona ta haddasa.
Kawo yanzu Barcelona tana ta takwas a teburin La Liga da maki 14, bayan buga wasa 10 a kakar bana.
Kungiyar da Ronald Koeman ke jan ragama ta ci wasa hudu a La Liga da canjaras biyu da rashin nasara hudu da kwantan wasa.
Barcelona ta yi rashin nasara a wasanni da dama a bana kamar yadda ta yi a 2017/18 da kuma 2018/19 a La Liga, yayin da ta yi rashin nasara a wasa uku ta kuma lashe kofin a 2018/19.
Sai dai kuma Barcelona tuni ta kai zagaye na biyu a gasar Champions League ta bana da maki 15, yayin da Juventus take ta biyu da maki 12 a rukuni na bakwai.
A kakar 2003 Enric Reyna shi ne ya rike Barcelona a matakin rikon kwarya, bayan da Joan Gaspart ya yi murabus. daga baya Radomir Antic ya maye gurbin Louis van Gaal a matakin koci.
A waccan kakar Barcelona ta fuskanci kalubalen samun gurbin shiga gasar UEFA Cup, inda kungiyar ta sa kwazo ta kuma samu gurbin a wasan karshe da ta buga.
Kuma a lokacin Laporte ya kalli karawar a matakin shugaban kungiyar a lokacin da ya ci zabe ya zama jagora na hudu a kungiyar a kakar.
A kakar 2020/21 za ta kammala ne da shugaba uku, bayan Josep Maria Bartomeu sai Carles Tusquets na rikon kwarya da wanda za a zaba ranar 24 ga watan Janairun 20210.
Hakika Barcelona na bukatar sa kwazo a kakar bana ko dai ta lashe La Liga ko kuma ta ci Champions League, bayan da Kyaftin Lionel Messi ake rade-radin zai bar Camp Nou a karshen kakar bana.
