Hakkin mallakar hoto
Getty Images
Liverpool ce ta lashe kofin Champions a 2018/2019
Atletico Madrid ta tsallaka zagayen daf da kusa da na karshe a gasar Champions bayan lallasa Liverpool da ta yi da ci 3 – 2 har gida.
Liverpool dai ita ce ta lashe gasar zakarun Turai a shekarar da ta gabata, amma a bana an kora ta gida a zagayen ‘yan 16.
Georginio Wijnaldum ne ya fara zura kwallo a raga cikin minti na 43 da fara wasan.
Wannan ya bai wa ‘yan wasan Liverpool kwarin gwiwar jin za su iya nasara a wasan lokacin da suke neman kwallo daya domin nasara.
Kwallon da Liverpool ta ci ta sa wasan ya zama kunnen doki saboda kwallo daya ita ma aka zura mata a wasan da suka na Spaniya.
Bayn cikar minti 90 ne a wasan, sai aka yi karin lokacin minti 30 domin samun gwani.
Roberto Firmino ne ya fara jefa kwallo a raga cikin karin lokacin da aka yi a minti na 90+4.
Dan wasan Atletico Madrid Marcos Llorente ne ya farke mata duka kwallaye biyun da aka zura mata a minti na 90+7 da kuma minti na 105.
A daidai lokacin Liverpool ta fito neman kwallo kwanta-da-kwarkwatarta abin da ya bai wa Alvaro Morata damar tamfatsa kwallo ta uku a ragar LIverpool.
Yanzu dai damar Champions ta kubuce wa Liverpool, ko da yake tana wata dama a gaba cikin gasar Premier inda kawai take bukatar wasa biyu domin lashe ta.
