Iyalan marigayi, Pa Taiwo Akinkumi mutumin da ya ƙirƙiro tutar Najeriya sun yi bikin binne shi bayan da gwamnatin tarayya ta gaza cika alƙawarin da tayi na yi masa bikin binnewa na musamman.
Akinkumi wanda ya mutu ranar 4 ga watan Satumba na shekarar 2023 yana da shekaru 87 ya kamata ace an girmama shi da jana’iza ta ban girma daga gwamnatin tarayya amma iyalansa suka gaji da jira abun da ya sa suka gudanar da bikin binne shi.
Akinwunmi Akinkumi ɗaya daga cikin ƴaƴan marigayin ya ce iyalan sun yi hakuri sun jira suga ko gwamnatin tarayya za ta cika alƙawarin da ta ɗauka amma shiru.
Ya bayyana cewa a ƙullum suna biya naira ₦2000 kuɗin ajiyar gawar a ɗakin ajiye gawarwaki.
Gwamnatin jihar Oyo ita ɗauki nauyin bikin binne marigayin da aka fara ranar Laraba aka kuma kammala ranar Juma’a a Ibadan babban birnin jihar.
An haife shi a ranar 10 ga watan Mayu a shekarar 1936 a garin Ibadan, Akinkumi an sanshi da wanda ya ƙirƙiri tutar Najeriya a shekarar 1958 inda aka bashi kyautar fam 100 a wancan lokaci.
