Rundunar yan sandan jihar Imo ta kama mutane 18 da ake zargi da zama yan kungiyar IPOB da suke da hannu a kisan ƴan sanda biyu a mahadar Ahiara dake karamar hukumar Ahiazu-Mbaise ta jihar.
Jami’an tsaron da suka tsaya shan mai a gidan man BOEK Petroleum a ranar Litinin sun fuskanci farmaki daga wasu ƴan bindiga da ake zargin ƴan IPOB ne.
Maharan na sanye ne da kayan sojoji inda suka farma ƴan sandan babu zato dake motoci uku kuma suka riƙa harbin kan me uwa da wabi.
A cewar Henry Okoye mai magana da yawun rundunar yan sandan jihar ya ce yan sandan biyu da aka kashe a harin sun haɗa da DPO na Ahiazu-Mbaise da kuma wani insifecta.
Ya ce mutanen na cigaba da amsa tambayoyi a yayin da ake cigaba da bincike.
