Gwamnan jihar Zamfara, Bello Matawalle ya dakatar da Sarkin Birnin Yandoto a karamar hukumar Tsafe ta jihar,Alhaji Aliyu Marafa bayan da ya naɗa wani kasurgumin dan bindiga, Ado Aleiro sarauta.
An naɗa Aleiro sarautar Sarkin Fulani a ranar Asabar.
A cewar sarkin an naɗa, Aleiro sarautar ne sakamakon rawar da ya taka wajen sulhun zaman lafiya tsakanin masarautar da kuma yan bindigar da suke addabar karamar hukumar Tsafe.
Amma kuma a wata sanarwa da sakataren gwamnatin jihar, Kabiru Balarabe Sardauna ya fitar gwamnatin ta nesanta kanta daga nadin sarautar da aka yi inda ta sanar da dakatarwar da gaggawa.
Tuni dai aka naɗa hakimin Yandoto, Alhaji Mahe Marafa domin ya cigaba da jagorantar masarautar.
