Dubban Mutane Sun Yi Zanga-Zanga Kan Tsadar Hayar Gidaje A Spain

Dubban mutane sun gudanar da zanga-zanga a Madrid, babban birnin Spain, domin nuna adawa da tsadar hayar gidaje da kuma korar masu haya daga gidajensu.

Masu zanga-zangar sun bukaci gwamnati ta ɗauki matakan gaggawa wajen rage hauhawar farashin gidaje tare da kare masu haya daga korar da suke fuskanta.

An gudanar da zanga-zangar ne ranar Asabar, inda mahalarta suka cika titunan birnin Madrid.

Zanga-zangar ta biyo bayan korar Maricarmen Abascal, mai shekaru 87, daga gidan da ta shafe mafi yawan rayuwarta tana zaune.

An tilasta mata barin gidan ne bayan wani kamfanin zuba jari ya sayi kadarar tare da ƙara mata kuɗin haya har sau biyar, abin da ya sa ta kasa ci gaba da biyan kuɗin.