Shugaban kasa, Bola Ahmad Tinubu ya tsawaita wa’adin shugaban hukumar kwastam ta Najeriya, Bashir Adeniyi da shekara guda.
A wata sanarwa mai magana da yawun shugaban kasar, Bayo Onanuga ya ce tsawaita wa’adin zai bawa Adeniyi damar kammala wasu sauye-sauye da yake aiwatarwa a hukumar.
Shugaba Tinubu ya nada Adeniyi a matsayin shugaban hukumar ta kwastam a watan Yunin shekarar 2023. Ya kuma tabbatar da nadinsa a watan Oktoba na shekarar.
Wa’adin jagorancinsa zai kare ne ranar 31 ga watan Agusta 2025.
Sanarwar ta bayyana zamanantar da aikin hukumar ta kwastam a matsayin daya daga cikin ayyukan da shugaban zai kammala.
