Wani mutum da ake zargin dan kunar baƙin wake ne a kungiyar Boko Haram ya tarwatsa kansa da bom a gidansa dake kan titin Ibrahim Haske a unguwar Keke dake karamar hukumar Chikun ta jihar Kaduna.
Mutumin ya tashi bom ɗin ne domin gudun kada jami’an tsaro su kama shi.
Wasu majiyoyi dake unguwar sun ce jami’an tsaro sun dade suna sanya ido akan mutumin kafin daga bisani su bi sawunsa zuwa wani gida dake unguwar da ta Keke inda yake buya a ciki.
Wata majiyar ta bayyana cewa jami’an hukumar DSS, yan sanda da kuma sojoji su ne suka zagaye gidan inda suka riƙa musayar wuta bayan da ya fuskanci jami’an tsaron sun kusa cimmasa ɗan ta’addar ya tarwatsa kansa da bom.
An gano bindigar AK-47 tare da wasu bama-bamai biyu da basu fashe ba a gidan mutumin.
