Za mu yi wa Kwankwaso da Shekarau adalci a Kano – PDP

Kusan ana iya cewa Jam`iyyar adawa ta PDP a jihar Kano na kunshe da wasu manyan bangarorin siyasa uku, inda kowane gida ke tinkaho da jama`arsa.

Wadannan ‘yan siyasa sun hada da tsoffin gwamnonin jihar biyu, wato Rabi`u Musa Kwankwaso wanda ya yi wa jam`iyyar kome da Malam Ibrahim Shekarau da kuma tsohon minista, Aminu Wali ke jagoranta.

Duk da cewa sun hade a jam`iyya daya wato PDP, masana na cewa akidojin bangarorin sun banbanta da juna.

Sanata Mas`ud El-Jibrin Doguwa shi ne shugaban jam`iyyar PDP na jihar Kano.

A tattaunawarsa da BBC kan yanda yake ganin jagoranci da kuma zaman da bangarori ukun ke yi a jam`iyyar:

Ya ce ‘daman wadanda suka tafi yawon ba nisa suka yi da dakunansu ba, kuma ba mu sa kowa a dakin nasu ba, saboda mun san za su dawo domin ba tafiya ce mai dorewa ba.’

Sanatan ya kuma ce ‘dawowarsu a yanzu za ta taimaka masu wajen aiwatar da abin da ba a taba yin irin sa a siyasar Kano ba.

Babu dai wanda ya yi tsammanin cewa tsoffin gwamnonin biyu za su kulla kawance karkashin inuwar jam’iyya guda.

Sai dai a wannan lokaci da ake ganin cewa jam’iyyar PDP na kunshe da wasu manyan gidajen siyasa.

Wadanda duka suke da tasiri a zaben 2019, Sanata Mas’ud ya ce a matsayin sa na shugaba wanda kuma ake sa ran ya yi adalci, duk wanda ya tsaya takara a wadanan bangarori uku kuma jama’a suka nuna shi suke so, to shi za su bai wa takara.

• Buhari ya yi wa su Kwankwaso fatan alheri
• Kwankwaso ko mazabarsa ba zai iya kawo wa ba — Ganduje

Kowanne bangare dai na ganin akwai gagarumar gudunmawar da zai bai wa jam’iyyar ta kai ga nasara a zaben 2019.

Wannan dalili ya sa ake hasashen yiwuwar samun rabuwar kawunan.

Amma a cewar shugabannin PDP a matakin Jiha, duk wanda ya kawo wa jam’iyyar gudunmawar cin zaben zai samu abinda yake so.

Hakazalika su ma wadanda aka tarar a cikin jam’iyyar za a musu adalci.

“Muna kan tattaunawa, kuma har yanzu ba a kai ga matakin cewa kowanne bangare akwai kaso na musamman da za a ba shi a Jam’iyya ba” in ji sanata Mas’ud.

“Burin jam’iyyar adawa ta PDP a yanzu bai wuce samun hadin kai wurin aiki a matakin jiha da kasa ba, domin ganin an warware duk matsalolin jam’iyyar da na neman takara.”