Za ku iya kauce wa matsalar huhu idan ku ka daina shan sigari yanzu

Hakkin mallakar hoto
Getty Images

Huhun dan adam na da wata dama mai cike da ban ta’ajibi da ke iya gyara wasu wasu sassa da zukar taba sigari ya lalata, amma fa har sai in mai yi ya daina, kamar yadda masana kimiyya suka ce.

Sai dai a cewar masanan, ko da mai zukar taba sigari ya sauya tunani ya daina, ba za a cire tsammanin zai iya kamuwa da kansar huhu ba.

Sabon binciken da aka wallafa a mujallar (Nature) ya nuna cewa kwayoyin halittun da ba su gamu da matsala ba sanadiyyar hayakin taba sigari na iya gyarawa ko ma farfado da wadanda shan tabar ya lalata.

An yi imanin hakan zai iya kasancewa a kan hatta wadanda suka shafe shekara 40 suna shan abin da bai gaza kwalin sigari guda a kowace rana kafin su daina ba.

Dubban sinadaran da ke kunshe a taba sigari dai na iya lalatawa, kana su sauya kwayoyin halittun jini na DNA da ke cikin huhu, kana sannu a hankali su kamu da cutar kansa.

Yawancin ƙwayoyin halittun da aka ɗauka daga masu shan taba sigari sun nuna cewa sun gamu da matsala ne saboda sinadaran da ke cikin taba sigari da yawan su ya kai dubu goma.

“Wadannan kwayoyin halittu da suka gamu da matsala su kan zama kamar wani dan karamin bam da ke kokarin fashewa, za su kumbura suntum, haka abin zai ci gaba har ya zuwa lokacin da za su girmama su zama kansa, wato kansar huhu kenan,” in ji Dr Kate Gowers, daya daga cikin masu bincike na UCL.

Toh sai dai da zarar mutum ya daina shan sigari, sai lafiyayyun kwayoyin halittun sa da ke cikin huhu su kara girma su maye gurbin wadanda hayakin tabar ya lalata.

• Kamfanin sayar da taba na Swindon na bai wa masu shan sigari karin hutu

• Akwai aniyar kawo karshen shan taba sigari a Birtaniya nan da shekarar 2030

A cikin mutanen da suka daina, kusan kashi 40 na kwayoyin halittun su na dai-dai da na wadanda ba su taba mu’amala da sigari ba, kamar yadda masu binciken suka shaida wa BBC.

“Daya daga cikin abubuwan da ke da jan hankali dangane da wadanda suka daina shan tabar shi ne jikin su ke kara samar da sabbin kwayoyin halittu kamar dai wadanda ba su taba shan tabar ba.”

Akwai bukatar ka tashi tsaye don dainawa

Har yanzu masu shan na da wani karin aikin a gabansu, na tantance nawa ne yawan huhun da aka gyara zuwa yanzu.

Binciken ya mayar da hankali ne kan manyan hanyoyin iska maimakon ƙananan tsarukan da ake kira alveoli, inda iskar oxygen ta ƙetare daga iskar da muke hurawa a cikin huhunmu.

A kan samu rahoton bullar cutar kansar hudu har 47,000 a Birtaniya a kowacce shekara sakamakon ta’ammali da taba sigari.

Binciken ya nuna cewa mutane na rage haɗarin kamuwa da kansar huhu daga ranar da suka daina shan taba.

Wani mai bincike a cibiyar kare yaduwar kansar huhu a Birtaniya Dr Rachel Orritt, ya ce “Tunani ne mai ban sha’awa cewa mutanen da suka daina shan taba sigari za su iya samun fa’idodi guda biyu.

“Na farko, sun rabu da barazanar kara lalacewar kwayoyin halittun huhunsu, na biyu kuma wadanda suka lalace din ma za su gyaru.”