Rundunar ‘yan sandan Jihar Katsina ta kama wata mata mai shekaru 27, Hadiza Ibrahim, bisa zargin satar kayayyaki da darajarsu ta kai Naira miliyan 10,102,000 a wani babban shagon sayayya na Green House da ke Katsina.
Jami’in hulda da jama’a na rundunar, DSP Abubakar Sadiq, ne ya tabbatar da hakan cikin wata sanarwa da aka fitar ga manema labarai a ranar Juma’a.
Sanarwar ta bayyana cewa rundunar ta samu rahoto daga babban jami’in tsaro na shagon Green House a ranar 4 ga Maris, 2026, kan wata mata da ake zargi da satar kaya a cikin shagon.
Rundunar ta ce an gano matar ne ta hanyar hotunan CCTV inda aka hango ta tana satar kayayyaki a shagon. Bincike ya biyo baya kuma hakan ya kai ga cafke ta.
Binciken da aka gudanar a gidanta ya kai ga gano kayayyaki masu yawa da darajarsu ta haura Naira miliyan 10, ciki har da takalma 74, mayafai 37, kayan wasanni 67, kayan yara 54, safa.da dama, kayan mata, jakunkuna, turare, sabulai, da sauran kayayyaki.
‘Yan sanda sun ce an tantance kayayyakin kuma masu su sun gane nasu, yayin da aka gano karin wadanda abin ya shafa. An kuma ce matar ta amsa laifin da ake zarginta da shi, kuma an gurfanar da ita a gaban kotu domin fuskantar shari’a.
Kwamishinan ‘yan sandan jihar ya yabawa jami’an da suka gudanar da aikin, tare da kira ga masu shaguna da su kara sa ido. Ya kuma tabbatar da kudirin rundunar na kare rayuka da dukiyoyin al’umma.
‘Yan Sanda Sun Kama Wata Mata Da Ake Zargi Da Satar Kayayyakin Naira Miliyan 10 A Katsina
