Rundunar ’Yan Sandan Jihar Kano ta yi wa manyan jami’anta 13 ado, bayan samun karin girma zuwa sabbin mukamai.
An gudanar da bikin ne a Masallacin (Mess) na Jami’an ’Yan Sanda da ke Kano, kamar yadda sanarwar da CSP Abdullahi Haruna Kiyawa, jami’in hulɗa da jama’a na rundunar, ya bayyana a ranar Litinin.
Sanarwar ta ce daga cikin jami’an da aka ɗaga akwai Kwamishinan ’Yan Sanda na Musamman (DCP) guda ɗaya, Mataimakan Kwamishinan ’Yan Sanda (ACP) huɗu, Manyan Sufurtandan ’Yan Sanda (CSP) bakwai, da Sufurtandan ’Yan Sanda (SP) guda ɗaya.
Daga cikin sunayen da aka ambata akwai DCP Muhammad Nuhu Digi, wanda aka ɗaga daga matsayin ACP zuwa DCP, sai kuma ACPs Musa Akawu, Ahmed Abdullahi, Abdullahi Usman da Saleh Buba, waɗanda aka ɗaga daga CSP zuwa ACP. Sauran jami’ai bakwai sun samu karin girma zuwa CSP, yayin da jami’i guda ɗaya ya samu karin girma zuwa SP.
Kwamishinan ’Yan Sanda na Jihar Kano, CP Ibrahim Adamu Bakori, ya taya sabbin jami’an murna, yana mai cewa an ba su wannan matsayi ne bisa jajircewarsu, biyayya da kyawawan ɗabi’unsu na aiki.
Ya ce: “Wannan karin girma kira ne zuwa ƙarin nauyin aiki. Ana sa ran za ku ci gaba da kiyaye gaskiya da ladabi, tare da bauta wa al’umma cikin sadaukarwa.”
CP Bakori ya kuma yabawa Sufeto-Janar na ’Yan Sanda, IGP Kayode Adeolu Egbetokun, bisa abin da ya bayyana a matsayin gyare-gyaren aiki da kuma inganta jin daɗin jami’an rundunar.
’Yan Sanda A Kano Sun Yi Wa Manyan Jami’ai 13 Adon Karin Girma
