Wuta ta kama tashar jirgin ƙasa na zamani a Legas

Wuta ta tashi a kan wani ƙaramin yanki na layin Lagos Blue Line a wuri da ke fuskantar tashar NEPA, kusa da gadar Eko, a yankin Apogbon na Jihar Lagos.

A cewar wani rubutu da Gboyega Akosile, mai magana da yawun Gwamnan Jihar Lagos, Babajide Sanwo-Olu, ya wallafa a shafin sa na X.com @gboyegakosile, lamarin ya faru ne da misalin ƙarfe 4:12 na yamma ranar Asabar.

Akosile ya kuma bayyana cewa ba a samu asarar rai ba, sannan babu wani jirgin ƙasa da ke aiki a lokacin da abin ya faru.

Ya ƙara da cewa tawagar ƙwararrun ma’aikatan lafiya da masu aikin ceto, tare da sauran masu amsa kira na farko, sun kashe wutar gaba ɗaya.