Kamfanin watsa lantarki na ƙasa, Transmission Company of Nigeria (TCN), ya sanar da shirin katse wutar lantarki na wucin-gadi a wasu sassan birnin Sokoto domin gudanar da aikin gyara na yau da kullum a tashar wutar lantarki ta Sokoto.
TCN ta bayyana hakan ne cikin wata sanarwa da babban manajanta na hulɗa da jama’a, Ndidi Mbah, ta sanya wa hannu a ranar Asabar. A cewar sanarwar, za a yi aikin gyaran kariya na shekara-shekara a kan na’urar wutar lantarki mai ƙarfin 30/40MVA a tashar watsar wuta ta Sokoto, daga ƙarfe 10 na safe zuwa 6 na yamma a ranar Asabar, 17 ga Janairu, 2026.
Kamfanin ya ce a lokacin aikin, Kamfanin Rarraba Wutar Lantarki na Kaduna ba zai samu wutar da zai rarraba wa wasu masu amfani a jihar ba. Yankunan da ake sa ran za su fuskanci katsewar wuta sun haɗa da wasu sassan garin Sokoto kamar Sama Road, Abuja Road, yankin Gagi, Minanata, Old Airport da Barikin Sojoji.
TCN ta jaddada cewa aikin yana da nufin inganta samar da wuta tare da tabbatar da tsaro, inganci da amincin kayan aikin watsar wuta. Kamfanin ya nemi afuwar masu amfani da wuta kan duk wata damuwa da katsewar za ta haifar, tare da roƙon fahimta yayin da ake ƙoƙarin inganta ayyukan wutar lantarki.
TCN Ta Sanar da Katsewar Wutar Lantarki na Wucin-gadi a Wasu Sassan Sokoto
