Akalla mutane biyu ne aka ruwaito sun mutu a wani gini da ya rufta a Nomansland da ke karamar hukumar Fagge a jihar Kano, tare da ceto wasu biyu da ransu.
An tattaro cewa lamarin ya faru ne da misalin karfe 2 na safiyar ranar Alhamis, biyo bayan mamakon ruwan sama da aka yi.
Jami’in hulda da jama’a na hukumar kashe gobara ta jihar Kano, Saminu Abudullahi, ya tabbatar da cewa, jami’an ceto sun yi nasarar ceto wasu mutane biyu da aka kwantar da su a asibiti, yayin da aka ci gaba da aikin fito da gawarwakin wadanda suka mutu.
Lamarin ya biyo bayan mummunar barnar da ambaliyar ruwar ta yi a jihar Kano.
A halin da ake ciki kuma, Hukumar Ba da Agajin Gaggawa ta Jihar Kano ta bayar da rahoton a ranar Larabar da ta gabata cewa, ambaliyar ruwan ta yi sanadiyyar mutuwar mutane 31 tare da lalata gidaje 5,280 a fadin kananan hukumomi 21 na jihar.
