Hukumar shirya jarrabawar kammala sakandare ta kasa, NECO, ta fitar da sakamakon jarrabawar SSCE ta musamman ta shekarar 2025, inda dalibai 68,166 daga cikin 96,979 suka samu kiredit biyar ciki har da Turanci da Lissafi, wanda ke wakiltar kashi 71.63.
An bayyana hakan ne a hedikwatar hukumar da ke Minna. Rijistara kuma Babban Darakta na NECO, Farfesa Ibrahim Wushishi, ya ce an fitar da sakamakon ne bayan kwanaki 52 da kammala jarrabawar da aka gudanar daga ranar Laraba 26 ga watan Nuwamban 2025 zuwa Asabar 13 ga watan Disamba, 2025, a fadin kasar nan.
Ya bayyana cewa dalibai 96,979 ne suka yi rajista, yayin da 95,160 suka zauna jarrabawar. Daga cikinsu, maza 50,785 ne, wanda ke wakiltar kashi 53.36, yayin da mata 44,375 ke wakiltar kashi 44.63.
Farfesa Wushishi ya kara da cewa dalibai 82,082, wato kashi 86.26, sun samu kiredit biyar zuwa sama ba tare da la’akari da Turanci da Lissafi ba.
Sai dai ya bayyana cewa an kama dalibai 9,016 da laifin satar amsa a jarrabawar, idan aka kwatanta da 6,160 a shekarar 2024, wanda ke nuna karin kashi 31.7.
Rijistaran ya ce an ba da shawarar hana masu kula da jarrabawa guda biyar aiki saboda taimakawa dalibai wajen satar amsa.
NECO ta jaddada kudirinta na dakile satar amsa da kuma tabbatar da sahihancin jarrabawa a fadin kasar nan.
NECO Ta Fitar Da Sakamakon SSCE Na 2025, Kashi 71.63 Sun Samu Kiredit Biyar
