Hukumar NDLEA dake yaƙi da hana sha da kuma fataucin miyagun ƙwayoyi ta kama wasu maniyyata su huɗu ɗauke da wata hoda da ake kyautata zaton hodar ibilis ce.
Mutanen da aka kama sun haɗa da Usman Kamorudeen, Olasunkanmi Owolabi, Fatai Yekini, da kuma Ayinla Kemi.
A wata sanarwa ranar Alhamis, Femi Babafemi mai magana da yawun hukumar ta NDLEA ya ce an kama mutanen ne a ɗakin wani otal lokacin da suke haɗiye ƙunshin ƙwayar hodar ibilis ɗin gabanin tashin su zuwa ƙasar Saudiya a ranar Laraba.
“Mutane huɗun da ake zargi an ajiye su ne a wani otal inda aka shirya musu ƙunshin ƙwayar hodar ibilis guda 200 mai nauyin kilogiram 220 domin su haɗiye a lokacin da jami’an NDLEA suka farma ɗakin,”
Sanarwar ta ƙara da cewa an gano ƙunshi 100 a kowane ɗaki inda mutane biyu za su haɗiye 100 kowannensu.
Tuni shugaban hukumar ta NDLEA, Buba Marwa ya yabawa jami’an hukumar na jihar Lagos kan kamen da suka yi.
