Hukumar yaƙi da sha da fataucin miyagun ƙwayoyi ta ƙasa (NDLEA) a jihar Edo ta kama wata tsohuwa ‘yar shekara 68 mai suna Evelyn Ogenewu tare da wasu mutane shida bisa zargin safarar miyagun ƙwayoyi.
An ce an kama ta ne tare da wani mai suna Friday Iruoje mai shekara 43, inda jami’an suka kwato kilo 23 na tabar wiwi da aka sarrafa.
Kwamandan NDLEA a jihar, Dr Mitchell Ofoyeju, ya bayyana cewa a wani samame da aka kai sansanin Yoruba Camp da ke dajin Olumoye a ƙaramar hukumar Ovia North East, jami’ai sun ƙwace kilo 563.5 na wiwi nau’in skunk, tare da kama wasu maza biyar da suka haɗa da Murtala Mohammed, Abdulkadir Idris, Ufoma Edafe, Anthony Aghati da Emmanuel Owalu.
Haka kuma, a wani farmaki a dajin Otuo da ke ƙaramar hukumar Owan East, jami’an sun gano buhuna takwas da kuma tubalan wiwi guda 60 da aka ɓoye a gonar koko, nauyinsu ya kai kilo 103.57.
A dajin Etiosa da ke Owan West, an gano gonaki uku na wiwi da aka lalata, yayin da jimillar abin da aka kama ya kai kilo 1,956.92.
Ofoyeju ya ce an gudanar da ayyukan ne bisa sahihan bayanan sirri, kuma an lalata gonaki da ake hasashen za su samar da kilo 1,266.85 na wiwi.
Ya jaddada cewa, “Za mu ci gaba da aiki da sahihan bayanai tare da ɗaukar mataki cikin gaggawa kan duk masu hannu a harkokin miyagun ƙwayoyi.”
NDLEA Ta Kama Tsohuwa ‘Yar Shekara 68 Da Wasu Mutane Shida Kan Safarar Miyagun Kwayoyi
