Hukumar Hana Sha da Fataucin Miyagun Kwayoyi ta Kasa (NDLEA) ta kama wani ɗan kasuwa ɗan Najeriya mai shekaru 59, Sylva Ezeokoli, bisa zargin safarar gram 700 na kwayoyin cocaine da ya ɓoye a cikin cikinsa.
An kama shi ranar Juma’a a dakin saukar baki na filin jirgin saman Murtala Muhammad da ke Ikeja, Lagos.
Ezeokoli, wanda ya kwashe shekaru 35 yana zaune a Brazil, yana dawowa gida ne ta jirgin Ethiopian Airlines daga São Paulo ta Addis Ababa.
Kakakin NDLEA, Femi Babafemi, a cikin wata sanarwa ranar Lahadi, ya ce binciken jikin wanda ake zargin ya bayyana wasu abubuwa a cikin cikinsa, wanda daga baya aka tabbatar cewa cocaine ne.
“A sakamakon haka, an sanya shi a karkashin kulawar fitar da abubuwan da ke cikinsa, inda daga baya ya fitar da wasu kunshi guda 29 da suka gwada tabbataccen sinadarin cocaine mai nauyin gram 700,” in ji Babafemi.
Ya ce wanda ake zargin ya bayyana cewa yana son sayar da kwayoyin a Najeriya don ya samu ƙarin jari don inganta kasuwancinsa.
Babafemi ya kara da cewa: “A cikin bayaninsa, wanda ake zargin ya ce yana da wani shagon kayan abinci da takalma da tufafi a Brazil. Ya kara da cewa ya sayi haramtacciyar kwayar a São Paulo da nufin sayarwa a Najeriya don tara babban jari domin bunkasa kasuwancinsa.”
NDLEA ta cafke wani ɗan kasuwa bisa zargin safarar ƙwayoyin cocaine mai nauyin giram 700
