Akalla Fulani makiyaya 20 ne aka bada rahoton mayakan ISWAP sun kashe a wasu hare-hare da suka kai wasu kauyuka dake jihar Borno.
Zagazola Makama dake wallafa bayanai kan sha’anin tsaro a yankin tafkin Chadi ya ce yan ta’addar sun kai farmaki kauyen Kukawa inda suka kashe Fulani makiyaya 14 a ranar 25 ga watan Yuli.
Tun da farko yan ta’addar sun saka dokar hana kiwon shanu, noma da kamun kifi a yankunan Kukawa, Doro da kuma Kula.
Jawabin da aka wallafa ya ce yan ta’addar sun yi dirar mikiya a kauyen kan babura kusan 17 inda suka zargi Fulanin da ketare iyaka da kuma yi wa sojan Najeriya leken asiri.
Ya kara da cewa yan ta’addar sun kuma kashe wasu karin makiyaya 6 a wani harin da aka kai a Kukawa duk a rana daya.
Bayan da kura ta lafa mutanen kauyen da suka samu nasarar tserewa sun gano gawarwaki hudu bayan sun dawo garin.
A wani labarin kuma mayakan kungiyar ISWAP sun samu yi garkuwa da wasu fulani makiyaya 7 a harin da suka kai Monguno.
