Hakkin mallakar hoto
Getty Images
Messi ne kan gaba a zira kwallaye a La Liga ta bana
Lionel Messi ya sake kamo Cristiano Ronaldo a wani shafin na kwallon kafa sakamakon kwallo uku rigis da ya ci a wasan La Liga da Barcelona ta casa Real Mallorca 5-2 ranar Asabar.
Yanzu haka Messi ya ci kwallo uku rigis a wasa daya har sau 35 a gasar La Liga, abin da ya sa ya kamo abokin hamayyarsa Ronaldo wanda shi ma yake da 35 a wasannin da ya buga wa Real Madrid.
Dan shekara 32, Messi ya ci wa Barcelona kwallo uku rigis sau 52 a dukkanin gasa, sannan ya ci wa kasarsa ta Argentina sau shida.
Sai da ya bayyana wa magoya baya kyautar gwarzon dan kwallon duniya ta Ballon d’Or a filin wasa na Camp Nou, wadda ya lashe a makon da ya gabata, kafin ya zazzaga kwallayen a raga.
Sau takwas ya ci uku rigis a gasar Zakarun Turai ta Champioins League, sau uku a Copa del Rey, sau daya a Spanish Super Cup.
Antoine Griezmann ne ya fara cin kwallo a wasan, sai Luis Suarez da ya ci tasa kwallon da dunduniya.
Kazalika Messi ne kan gaba a zira kwallaye a raga a La Liga ta bana da kwallo 12, sai kuma Kareem Benzema da yake biye masa da kwallo 11.
Har wa yau, Barcelona ce ta daya a saman teburin da maki 34, amma fa Real Madrid ma maki 34 din gare ta a mataki na biyu, Sevilla a matsayi na uku da maki 30 da kuma Real Sociedad mai maki 26.
