Mm
Gwamnatin Jihar Jigawa ta fito da wani shiri na dasa ingantattun itatuwan dabino 10,000, a wani yunkuri na habaka harkar noma da kuma kara karfin fitar da amfanin gona zuwa kasashen waje.
Wannan na kunshe cikin wata sanarwa da Babban Sakataren Yada Labaran gwamnan jihar, Hamisu Muhammad Gumel, ya rattabawa hannu, wadda aka aikawa manema labarai.
A cewar sanarwar, Gwamna Malam Umar Namadi ya bayyana wannan shiri ne yayin wata muhimmiyar ganawa da kwararrun masana dabino daga kasar Saudiyya, da aka gudanar a gidan Jakadan Saudiyya da ke Kano.
Gwamnan ya bayyana shirin a matsayin wani babban mataki na daga martabar Jigawa a kasuwar dabino ta duniya. Ya ce za a noma tsirran dabinon na gida da na kasuwanci ta amfani da sabbin dabarun kimiyya, domin samar da amfanin gona mai inganci da zai dace da bukatun kasuwannin ketare.
Ya kara da cewa shirin zai taimaka wajen inganta iri, daidaita tsarin gonaki da kuma bullo da hanyoyin noma na zamani domin kara yawan amfanin gona.
