Wani fitaccen jarumin masana’antar shirya fina-finan Hausa ta Kannywood, Umar Ascon, ya rasu.
Marigayin ya shahara musamman wajen taka rawar Alhaji Lado Mai Barkono a cikin shirin talabijin mai dogon zango mai suna Garwashi.
Rahotanni sun ce Umar Ascon ya rasu ne a ranar Asabar 14 ga watan Maris, 2026, a Asibitin Koyarwa na Malam Aminu Kano da ke Kano, bayan ya shafe lokaci yana fama da jinya.
Furodusa a Kannywood kuma maƙwabcin marigayin, Abubakar Yahaya Matinko, shi ne ya tabbatar da rasuwar jarumin.
Marigayin ya bar matarsa mai juna biyu da kuma ’ya’ya mata biyu.
Kafin ya shiga harkar fim, Umar Ascon ɗan kasuwa ne da ke gudanar da sana’arsa a Hotoro Depot a Kano.
Daga bisani ya samu karɓuwa a Kannywood ta hanyar rawar da ya taka a shirin Garwashi, sannan ya fito a wasu fina-finai na Hausa kamar Wata Shida da Manyan Mata.
An yi sallar jana’izarsa a Masallacin Al-Masjlisul Islami da ke kusa da Gade-Gade Filling Station, inda aka binne shi bisa tsarin addinin Musulunci.
Jarumin Kannywood Umar Ascon Ya Rasu
