Rahotonni daga jihohin Borno da Yobe a arewa maso gabashin Najeriya sun nuna cewa wani harin jirgin yaƙi ya yi sanadin mutuwar gomman mutane da suka je kasuwar Jilli.
Kasuwar na kan iyakar ƙananan hukumomin Gubio da Geidam a jihohin biyu.
Wata majiyar tsaro ta tabbatar da faruwar harin ga BBC, amma ta ƙi yin ƙarin bayani kan lamarin.
Kansilan mazaɓar Futchimiram a ƙaramar hukumar Geidam, Hon. Lawan Zanna Nur, ya ce an kai harin ne da tsakar rana a ranar Asabar, a daidai lokacin da jama’a ke kasuwanci.
Ya ƙara da cewa, “Kodayake abin ya faru da rana da misalai ƙarfe 2 zuwa 3 na rana, labari bai zo mana ba sai da daddare, saboda nisa da kuma rashin sabis ɗin waya a yankin”.
Harin Jirgin Yaƙi Ya Hallaka Mutane Da Dama A Iyakar Borno Da Yobe
