Gwamnatin Jihar Bauchi ta dauki sabon mataki na ƙarfafa tsaro a filin jirgin saman kasa da kasa na Sir Abubakar Tafawa Balewa da ke Bauchi, inda ta haramta duk wasu ayyukan noma da kiwo a cikin harabar filin jirgin.
Babban sakataren ma’aikatar ayyuka da gidaje na jihar, Injiniya Mohammad Hamisu Garba, ne ya bayyana hakan yayin wani taron tsaro da na masu ruwa da tsaki da aka gudanar a filin jirgin. Ya ce wannan mataki yana daga cikin umarnin Gwamna Bala Mohammed na tabbatar da ingantaccen tsarin tsaro a filin jirgin domin kaucewa duk wata barazana.
A cewar Hamisu, gwamnati ta tura jami’an sa ido guda bakwai daga cikin al’ummomin da ke makwabtaka da filin jirgin, wadanda za su rika hada kai da jami’an filin jirgin wajen kula da ayyuka, bayar da rahoton duk wata alama ta barazana, da kuma hana fasa-kaure.
Ya kara da cewa nasarar jigilar alhazai zuwa ƙasa mai tsarki daga filin jirgin a bana na shekarar 2025 na nuna cewa filin na aiki da ingantaccen tsarin gudanarwa.
Hamisu ya bukaci sarakunan gargajiya da su taimaka wajen wayar da kan jama’a da kuma tabbatar da hadin kai domin kare wannan muhimmiyar cibiyar sufuri.
A nasa jawabin, Manajan Darakta na Filin Jirgin, Surveyor Babagana Muhammad Tata, ya bayyana cewa an fuskanci wasu hare-hare na barna a filin jirgin a baya-bayan nan. Saboda haka, ya bukaci sake fasalin tsarin tsaron filin gaba ɗaya, tare da kiran al’ummomin da ke kusa da su dauki filin a matsayin na su domin kiyaye shi.
Gwamnatin Bauchi Ta Haramta Noma da Kiwo a Kewaye da Filin Jirgin Sama Don Ƙarfafa Tsaro
