Gwamnan Jihar Kwara, AbdulRahman AbdulRazaq, ya karɓi mutane 23 da sojojin Najeriya suka ceto a ranar Talata, a Hedkwatar Rundunar Sojojin 22 Armoured Brigade dake Ilorin, babban birnin jihar.
Mutanen da aka ceto sun samu ‘yanci ne bayan wani aiki na soja da aka tsara tare da haɗin gwiwar jami’an tsaro. Gwamna AbdulRazaq ya yaba wa sojojin kan jajircewarsu da sadaukarwarsu, inda ya ce nasarar ta nuna haɗin kai da sabuwar ƙwazon hukumomin tsaro a yaki da fashi da ƙwace mutane.
AbdulRazaq ya tabbatar wa waɗanda aka ceto cewa gwamnati za ta tallafa musu wajen samun cikakken farfadowa daga abin da suka shiga. Ya ce, “Muna farin cikin ganin mutane 23 sun samu ‘yanci kuma an gabatar da su a yau. Gwamnati za ta tsaya tare da su wajen farfadowarsu. Kalubalen da muke fuskanta na ɗan lokaci ne. Kamar yadda GoC ya ce, ko waɗannan ‘yan ta’adda su bar Kwara ko kuma su mutu anan. Wannan jihar zaman lafiya ce.”
Haka kuma, gwamnan ya bayyana shirin tura masu gadi na daji bayan rundunar ta kammala ayyukan tsaftace yankuna, domin tabbatar da zaman lafiya da baiwa manoma damar komawa gonakinsu cikin aminci.
Gwamnan Kwara Ya Karɓi Mutane 23 Da Aka Ceto Daga Ƙungiyoyin Ƴan Fashi
