Gwamnan jihar Kano, Abba Kabir Yusuf ya kori, Shehu Wada Sagagi daga kan mukaminsa na kwamishinan ma’aikatar kasuwancin, zuba jari da masana’antu ta jihar.
Gwamnan ya sanar da korar Sagagi ne a cikin wata sanarwa da mai magana da yawun sa, Sanusi Bature Dawakin Tofa ya fitar a ranar Alhamis.
Sanarwar ta umarci Sagagi da ya mika ragamar ma’aikatar ga daraktan kasuwanci na ma’aikatar kafin umarni na gaba.
Gwamna Yusuf ya yabawa kwamishinan kan gudunmawar da ya bawa jihar a fannoni da dama
Ya ce Sagagi ya taka muhimmiyar rawa a siyasa, addini da kuma bunkasa kanana da matsaikaitan masana’antu a jihar.
