Tashin hankali na ƙaruwa a jihar Katsina yayin da Gwamna Dikko Umaru Radda ya kira taron gaggawa na Kwamitin Tsaro a Fadar Gwamnati domin duba halin da ake ciki.
Taron, wanda har yanzu ke gudana, ya haɗa manyan jami’an tsaro daga rundunar sojojin Najeriya, hedikwatar tsaro, DSS da kuma ’yan sanda, lamarin da ke nuna tsananin muhimmancin batun.
Haka kuma, akwai wakilai daga Hukumar Shige da Fice, NSCDC, Kwastam, FRSC, Hukumar Kashe Gobara ta Tarayya da NDLEA, tare da shugabannin ƙananan hukumomin da abin ya shafa.
Sauran mahalarta sun haɗa da Kwamishinan Tsaron Cikin Gida, sarakunan gargajiya, shugabannin addini da manyan jami’an gwamnati.
Rahotanni sun ce ana nazarin halin tsaro a jihar tare da nemo hanyoyin ƙarfafa haɗin gwiwar hukumomin tsaro domin shawo kan barazanar da ake fuskanta.
A baya-bayan nan, ’yan bindiga sun kai hare-hare a wasu ƙauyuka biyu na ƙaramar hukumar Matazu, inda suka kashe ɗan sanda guda tare da jikkata fararen hula biyu. An ce an kai waɗanda suka jikkata asibiti domin samun kulawa.
Gwamna Radda Ya Kira Taron Gaggawa Kan Tsaro Bayan Hare-hare A Katsina
