Fasinjoji 6 da shanu 11 aka bada rahoton sun mutu a wasu jerin hatsuran mota da suka faru a Gada Biyu dake kan babbar hanyar Abuja zuwa Lokoja.
Wani shedar gani da ido ya ce hatsuran sun faru ne duk a guri ɗaya a tsakanin ranakun Alhamis da Asabar kuma sun rutsa da motar tirela dake ɗauke da shanu, Toyota Sienna, J5 da kuma wata motar Daf.
Ya ce mutane 14 sun samu raunuka ya kuma alaƙanta hatsuran da rufe titin da aka yi sakamakon sauya hanyar da ake bi da aka yi saboda aikin gyaran hanya da ake yi.
Ya ƙara da cewa mafi muni a cikin hatsuran shi ne wanda ya rutsa da mota ƙirar J5 da kuma tirela dake ɗauke da shanu inda mutane biyu dake cikin J5 din suka ƙone ƙurmus.
Wani babban jami’in hukumar FRSC dake kiyaye afkuwar hatsura akan titunan Najeriya wanda aka yi aikin ceton mutanen da shi ya tabbatar da faruwar hatsuran da ya alaƙanta da sauya hanyar da aka yi na wucin gadi saboda aikin gyaran titin.
