![Olivier Giroud scores for Chelsea against Crystal Palace](https://arewa.ng/storage/2020/07/1594150967_495_Chelsea-ta-koma-ta-uku-a-teburin-Premier-League.jpg)
Hakkin mallakar hoto
Getty Images
Giroud ne ya fara ci wa Chelsea kwallo kuma na uku kenan da ya zura a raga tun da aka ci gaba da wasannin Premier League
Chelsea ta doke Crystal Palace da ci 3-2 a wasan mako na 34 a gasar Premier League da suka fafata ranar Talata a Selhust Park ta kuma koma ta uku a teburi.
Chelsea ce ta fara cin kwallo a minti na shida da fara wasa ta hannun Olivier Giroud, sannan Christian Pulisic ya kara na biyu.
Daga nan Palace ta zare kwallo daya ta hannun Wilfried Zaha, kuma haka suka je hutu Chelsea ta ci biyu ita kuwa Palace da daya a raga.
Bayan da aka ci gaba da karawar zagaye na biyu ne Chelsea ta kara na uku ta hannun Tammy Abraham wanda ya shiga karawar daga baya.
Sai dai minti daya tsakani da Chelsea ta ci kwallo na uku ne, Christian Benteke ya zare daya.
Nasarar da Chelsea ta yi ya sa ta koma ta uku a teburin Premier League da tazarar maki biyu tsakaninta da Leicester City wacce ta koma ta hudu.
Leicester za ta ziyarci Arsenal a daya wasan mako na 34 da za su kece raini a gasar ta cin kofin Premier League wacce tuni Liverpool ta cinye kofin bana.
Crystal Palace mai maki 42 tana ta 14 a kasan teburin shekarar nan, kuma ta yi rashin nasara a wasa hudu a jere.