Bayyana tsiraici ba uzuri ne na yi wa mata fyaɗe ba – Sheikh Pantami

FMoCDENIGERIA

Hakkin mallakar hoto
FMoCDENIGERIA

Image caption

Sheikh Isa Pantami ya kuma bayyana damuwa kan yadda shari’o’in masu fyaɗe kan shafe tsawon lokaci a gaban kotuna.

Wani fitaccen malamin addinin Musulunci kuma minista a Najeriya, ya ce babban abin tsoro ne, ƙaruwar saɓon Allah kamar aikata fyaɗe a daidai lokacin da duniya take fama da annoba.

Dr. Isa Ali Pantami ya ce matsalar ƙaruwar fyaɗe baya-bayan nan a sassan ƙasar, “annoba ce ta shigo cikinmu kuma jarrabawa ce, bala’i ne kuma”.

“Abin da ke ba ni tsoro, lokacin da ya dace mu ƙara ƙasƙantar da kanmu, mu koma zuwa ga Allah (SWT)” in ji malamin amma ayyukan laifi suna ƙara yawa. “Bil haƙiƙa, wannan bala’i ne”.

Sheikh Pantami ya bayyana haka yayin wata zantawa da wakilin BBC Haruna Shehu Tangaza.

Ya ce ba hujja ba ce mutum ya auka wa mace don kawai ta sanya tufafin da yake jin suna fito da tsiraici. “Addini ya wajabta maka, ka runtse ganinka,” in ji Panatami.

A cewarsa, idan wata ta fito waje ko da tsirara take yawo, tsanani mutum ya kawar da kai, ya nemi tsarin Allah. Kada ya ƙara kallo.

Duk da haka, malamin ya ce su ma mata akwai haƙƙi kansu na yin shigar kamala. Da kuma guje wa aikata duk abin da zai ja hankalin wani matuƙar yin hakan bai kamata ba.

A baya-bayan nan dai, al’ummar Najeriya na ci gaba da bayyana damuwa saboda ƙaruwar ayyukan fyaɗen da ake samu a kan mata da ƙananan yara, lamarin da ya kai ga kiraye-kirayen a ƙara tsananta hukunci.

Lamarin da shi ma malamin ya nanata, inda yana da kyau a ƙarfafa dokoki a kan batun fyaɗe sannan a tabbatar ana aiki da su kan mutanen da kotu ta kama da laifi.

Hakkin mallakar hoto
Nigeria Police force

Image caption

Mohammed Adamu ya ce zuwa yanzu an kama mutum 799 da ake zargi yayin da aka gudanar da bincike kan lamari 631 aka kuma gurfanar da su a kotu

Sheikh Pantami ya ce haƙiƙa akwai buƙatar sake waiwayar dokoki musamman saboda yadda matsalar fyaɗe ke neman zaman ruwan dare a Najeriya.

“Akwai abin da suke cewa lacuna a law shi ne sai ka ga wata magana ta yi harshen damo. Sai ka ga (ma’anarta) ba ta fito fili ba, sai a je kotu a yi ta musu,” in ji shi.

Ya ce ya dace a yi doka tsayayyiya, wadda za ta fayyace ƙarara cewa duk wanda ya yi abu kaza, hukuncinsa kaza ne.

Malamin addinin Musuluncin ya kuma buƙaci shigar da hukunce-hukuncen addini cikin dokokin yaƙi da fyaɗe, tun da a cewarsa addini ya yi magana a kansu.

“Idan fyaɗe babu aiki da ƙarfi, babu baarzana ga ran mace ko ga mutuncinta, to ana ɗaukar wannan al’amari a matsayin zina ne kamar yadda ya zo cikin suratul Annur,” in ji minista.

Sai dai ya ce matuƙar an yi amfani da ƙarfi da barazana kamar ta makami, to wannan hukuncinsa na cikin suratul Ma’idah.

Dr. Pantami ya kuma ce waɗannan dokoki ne Allah, kuma al’ummomin da suka kwatanta aiki da su, sun zauna lafiya.

Don haka ya buƙaci jihohin Najeriya su yi nazari kan dokokin da suke da su, kuma su dubi hanyoyin da za su ƙarfafa su, tare da tabbatar da aiki da dokoki ga masu aikata fyaɗe.

More News

An ji ƙarar harbe-harbe a fadar Sarkin Kano

A daren ranar litinin ne aka bayar da rahoton jin harbin bindiga a kusa da karamar fadar inda hambararren Sarkin Kano, Aminu Ado Bayero,...

Ministan shari’a nason INEC ta riƙa shirya zaɓen ƙananan hukumomi

Babban lauyan gwamnatin tarayya kuma ministan shari'a, Lateef Fagbemi ya yi kira da a soke hukumar zaɓen jihohi masu zaman kansu. Da yake magana a...

Kotu ta hana Aminu Ado ayyana kansa a matsayin Sarkin Kano

Babbar Kotun jihar Kano ta hana Aminu Ado Bayero ayyana kansa a  matsayin Sarkin Kano har sai ta kammala sauraron ƙarar dake gabanta. Kotun ta...

NDLEA ta kama wani ɗan kasuwa da ya haɗiye ƙunshi 111 na hodar ibilis  a filin jirgin saman Abuja

Jami'an Hukumar NDLEA dake yaƙi da hana sha da fataucin miyagun ƙwayoyi  sun kama wani mutum mai suna Emmanuel Orjinze wani ɗan kasuwa akan...