Bauchi: ‘Za a rataye masu yi wa ƙananan yara fyaɗe’

Gwamnatin jihar Bauchi ta kafa wata doka da ake kira BAP wadda ta tanadi hukuncin kisa ta hanyar rataya ga duk wanda aka samu da laifin yi wa yara kanana Fyade.

Haka ma dokar ta tanadi ɗaurin rai da rai ga wanda ya yi wa babbar mace fyade da kuma ɗaurin shekaru 20 ga wadanda suka yi wa mace daya taron dangi.

Wannan dai na zuwa ne yayin da hukumomin ‘yan sanda a jihar suka ce sun samu rahotannin aikata fyade har 21 a cikin wata ɗayan da ya wuce kawai.

Ko a baya-bayan nan ma ‘yan sanda a jihar sun sanar da kama wani mutum da suke zargi da yi wa wata yarinya ‘yar shekaru uku fyade.

DSP Muhammad Ahmad Wakili, kakakin rundunar ‘yan sandan jihar ta Bauchi ya ce dokar tuni aka amince da ita a majalisa kuma za a wallafa ta.

A cewarsa, tsakanin watan Yuli da Agusta sun gabatar da mutum 22 da ake zargi da aikata fyade gaban ‘yan jarida.

Ya ce sun yi hakan saboda “muna son mutane su kyamaci wannan abin su gane cewa idan an yi wa mace fyaɗe mai da al’uma baya ne saboda har ta gama rayuwarta da wannan (ƙyamar da ake nuna mata).”

DSP Wakili ya ce laifin fyaɗe ba wai yarinyar da aka yi wa ya shafa ba, laifin ya shafi ƙasa ne.

“Duk wanda muka kama ya yi fyaɗe, ba za mu yi wata-wata ba, sai mun gurfanar da shi gaban kotu, kuma wannan (dokar) BAP ita za mu saka ma shi a gaban kotu.” in ji DSP Wakili.

More News

Ƴan sanda sun kama wani gawurtaccen mai garkuwa da mutane a Kaduna

Jami'an ƴan sanda sun samu nasarar kama wani gawurtaccen mai garkuwa da mutane a jihar Kaduna. Mutumin da aka kama mai suna, Muhammad Bello ɗan...

An yi zanga-zanga a fadar shugaban ƙasa da majalisar ƙasa kan dawo da Sarki Sanusi

Wasu masu zanga-zanga sun yi jerin gwano ya zuwa ƙofar fadar shugaban ƙasa da kuma majalisar dokokin ta tarayya kan dawo da Sarki Muhammadu...

Gwamnan Kano ya sanya hannu kan sabuwar dokar masarautun jihar

Gwamnan jihar Kano Abba Kabir Yusuf ya sanya hannu kan sabuwar dokar masarautun jihar ya kuma sanar da sake naɗa, Muhammad Sanusi a matsayin...

Sanusi ya sake zama Sarkin Kano

Shekaru hudu bayan sauke Muhammadu Sanusi II daga matsayin Sarkin Kano, Gwamna Abba Yusuf, na jihar Kano ya mayar da shi kan karagar mulki.Gwamnan...