Hakkin mallakar hoto
Getty Images
Joao Felix ya lashe gasar LIg da Benfica a kakarsa ta farko
Atletico Madrid ta sayi matashin dan wasan Portugal Joao Felix kan fam miliyan £113 daga Benfica – inda ya zamo dan kwallo mafi tsada na biyar a duniya.
Benfica ta tabbatar cewa Atletico za ta biya kudin da kadan kadan, bayan da ta kara Yuro miliyan 6 kan kudin da aka gindaya a matsayin sharadin daukar dan wasan mai shekara 19.
Neymar da Kylian Mbappe da Philippe Coutinho da kuma Ousmane Dembele ne suka fi shi tsada.
Felix ya sanya hannu kan yarjejeniyar shekara bakwai da Atletico.
A bara ya fara bugawa Benfica wasa a watan Agusta sannan ya zura kwallo 15 a kakar da ta gabata inda suka lashe gasar Lig ta kasar.
A ranar Laraba kuma Atletico ta tabbatar da sayen ‘yan wasa biyu daga FC Porto.
Dan kwallon Mexico Hector Herrera, mai shekara 29, ya sanya hannu kan yarjejeniyar shekara uku bayan da kwantiraginsa ta kare, yayin da dan kwallon baya na Brazil Felipe, ya koma kan fam miliyan 17.9.
Kulob din ya kuma tabbatar da sayar da dan wasan Sifaniya Rodri ga zakarun Ingila Manchester City kan fam miliyan 62.8.
