‘Yan bindiga da ake zargin ‘yan kungiyar asiri ne sun harbe wani mai suna Danladi, ɗaya daga cikin ‘ya’yan Serikin Hausawa a Birnin Benin, babban birnin jihar Edo.
Marigayi Danladi ya kasance yana shirin yin aure a watan Disamba kafin a kashe shi.
An rawaito cewa an kashe marigayin ne a shagon wani abokinsa da ke da nisan kimanin mita 100 daga yankin ‘yan sanda na Esigie a ƙaramar hukumar Oredo a jihar Edo.
Wata majiya da ya nemi a sakaye sunanta ta bayyana cewa, Danladi na zaune a shagon abokinsa a kan titin Enohuwa lokacin da ‘yan bindigar suka fito daga cikin mota GLK Benz suka harbe shi sau biyu daga kusa.
Majiyar ta bayyana marigayi Danladi a matsayin mutum mai sauƙin hali, “Shi ɗan Serikin Hausawa ne a wannan yankin. Mutuwar Danladi ta haifar da babban gibi a cikin iyalinsa kuma babban rashi ne ga matar da zai aura.”
Ana zargin ƴan ƙungiyar asiri da hallaka Sarkin Hausawan Edo
