Rundunar ƴansandan jihar Kaduna a ranar Laraba ta tabbatar da anyi garkuwa da wasu masu hakar ma’adinai a kauyen Bogoma a karamar hukumar Birnin Gwari dake jihar.
Mai magana da yawun rundunar ƴansandan jihar,Yakubu Sabo shine ya fadawa kamfanin Dillancin Labaran Najeriya NAN haka a Kaduna.
Sabo ya ce masu hakar ma’adanan su 16 an sace su ne dai-dai lokacin da suke komawa gida cikin wata babbar mota daga wurin da suke hakar ma’adanan.
“Barayin sun kama wani mai suna Isa Sa’idu da kuma wasu mutane 15 dukkaninsu sun fito daga kauye ɗaya,” ya ce.
Ya kara da cewa tawagar rundunar ƴansanda ta musamman dake yaƙi da garkuwa da mutane na bincika yankin domin ganin an ceto mutanen tare da kama masu garkuwa da su.
Aikata garkuwa da mutane a yankin na birnin Gwari a bune da ya zama ruwan dare a yankin duk da kokarin da hukumomin tsaro suka ce suna yi na shawo kan lamarin.
