Hakkin mallakar hoto
Getty Images
An yanke wa dan wasan Barcelona, Arda Turan hukuncin daukin talala na kusan shekara uku, bayan da ya yi harbi da bindiga a asibiti, lokacin da ya rikici da wani mawaki.
Turan wanda ke buga wasannin aro a kungiyar Istanbul Besaksehir ta Turkiya – ya yi doki in doka da Berkay Sahin a bara, har ta kai ya fasa hancin shahararren mawakin.
Daga nan ne dan wasan Barcelona ya je asibitin da aka kai Sahin, sannan ya yi harbi da bindiga, inda ya harbi dabe.
An yanke masa hukuncin ne kan ya yi harbin da ya tayar da hankalin mutane da mallakar makami ba bisa ka’ida ba, da yi wa mutun rauni da gangan.
Kotun da ta saurari karar ta yanke masa hukuncin daurin gidan yari na shekara biyu da wata takwas, amma ba zai yi zaman kurkuku ba, har sai ya kara wani babban laifi nan da shekara biyar.
Ita kuwa kungiyar Istanbul Basaksehir ta ci tarar dan kwallon mai buga wasan tsakiya kudin Turkiya lira miliyan 2.5 wato fan 350,000.
Wasu rahotanni sun ce Berkay Sahin yana tare da matarsa, Ozlem Ada Sahin a wani gidan rawa a Istanbul a watan Oktoban bara, lokacin da fadan ya barke.
Uwar gida Sahin ta shaida wa wata jarida cewar Turan ne ya yi mata wasu kalamai mara dadi sannan ya farwa mijinta wanda ya yi suna a Turkiya a fagen waka.
Daga baya ne aka kai mijin nata asibiti, wanda likitoci suka yi wa aiki, sakamkon fasa masa hanci da aka yi.
